Search
【愚樂無窮：深夜睇波團】20210119 EP049
今集討論最新冬季轉會情況，簡單講下曼城二億歐元增兵名單，同埋回顧上周雙紅會和巴塞輸左西超盃戰況。
深夜二點同大家一齊睇英超快車-韋斯咸對西布朗。上半場補時尾段，韋斯咸憑祖法助攻俾保雲心口撞射入網打破僵局，領先1:0。下半場51分鐘，西布朗憑皮利拉神仙吊波追平1:1，不過好景不常，66分鐘西布朗失守，韋斯咸利用安東利奧身體優勢，壓贏西布朗後防球員側身倒掛，領先2:1，令韋斯咸全取三分，繼續站在英超榜前列位置。
主持：小菜、阿火、Tony、安迪
《深夜睇波團》Youtube Playlist：
https://bit.ly/2FqPNLX
《運動真理學》節目群組：
https://bit.ly/3c5DkIu
《雜亂無章的變動 缺乏硬度的大敗 錫菲聯對車路士賽後分析》
.
「雜亂無章 缺乏硬度」，哩八個字足以概括得到今場大敗既原因，相對於車路士今場波既表現，錫菲聯無論喺戰術執行還是目的想都比起藍軍更似一隊強隊，姑勿論最後車路士能唔能夠保持喺前四行列，但以哩場波既過程都睇到我地係無資格留喺哩個位置。
.
你話係咪好失望，感覺上又未去到要有個好字，自復賽後雖然車路士都喺大部份場次能夠全取三分，但其實有留意開文章既朋友都知，個人認為多數入球都係取決於某幾位攻擊球員既自身能力，大於戰術上既配合，而同時後場既失誤亦無減少，引致有某啲場次都係勝在運氣搭救，再加上今場波開始出現傷員問題，前線球員啞火，種種原因喺同一場內發生，亦成為輸波既關鍵。
.
簡迪受傷，基爾摩亞提早收咧，而高華錫亦剛傷癒避戰，林伯特手中能夠運用既中場球員可以話一眼睇哂，佐真奴解凍打正選，另外兩名中場繼續源用巴克利及蒙特，而前場方面亦都只係換入艾巴咸替代基奧特，左右兩邊就繼續係佩利錫同韋利安，至於後場組合方面亦都一樣，蘇馬拍基斯甸臣主守中路，左右兩閘就由隊長艾斯派古達同尼爾斯占士擔任，如果單睇哩張正選名單的話，大部份安排都正路，唯一疑問就係點解魯迪加會連續兩場都無正選打？
.
錫菲聯並唔似得大部份英超中下游球隊一樣，喺強弱之差時會縮後打反擊，相反佢地係相當積極咁喺前場佈置，唔會比太多空間你作出思考定段，務求迫使你盡快交出控球權，再加上大部份錫菲聯球員身材高大健碩，拍埋去我地真係差一大截，亦踢得相當吃力，即使係咁車路士亦繼續以傳控為戰術基礎，而佐真奴亦多次嘗試長傳急攻將前線推前及加快節奏，不過得到既就只係控球率，實際埋門機會其實都相當之少。
.
之前都講過喺無乜反擊或者到跑到一段既空間之下，艾巴咸既場上效果會好自然減半，個人認為基於上半場既打法同表現都要喺半場果下調動換入基奧特，而唔係再去到之後既時間先派佢上場，而喺哩次調動之中選擇轉陣打三中堅亦係一個正路既思路，但去到之後時間換入奧岱後由變番424定442陣式就真係摸不著頭腦，亦埋下左輸第三球既伏線。
.
而今場波喺邊路既運作上亦都好唔順暢，小組走位好多時有人喺前面既時候球員都選擇向後傳，而前面既球員都會舉手埋怨點解唔向前傳，哩個畫面出現得相當之多，而同時韋利安同占士喺右路既配合亦都相當唔夾，好多時有一個人走錯位或者兩個走去同一個位炒車，亦係頻繁出現，再加上今場波有一半係無目標既傳送，基本上同送返個波比對手無乜分別。
.
至於果三個失波，只能夠講都係老毛病，後場球員唔集中，各自為政打自己波，而唔係聯合防守，導致一個人失位之後連鎖地一齊做錯，一而再再而三咁就出現左三個失波，今場大敗令到林伯特有必要痛定思痛地諗下球隊喺執行戰術上既細節，如果再單靠前場球員既個人能力去爭取入球，而佢地無態或被針對下啞火，受壓既就將會變成己隊既後防球員，而基斯甸臣亦都多次証明自己並唔適合打英超，何解仍要執意用佢令到球隊身陷險境呢？
.
黎緊仲有三場賽場，主動權已經不在手中，只能做好自己打好每場波...
.
《岩睇既比個Like支持我地啊！》
作者 : 藍獅 BluexLion
-------------------------------
同場加映《復賽後至今四場仍未上陣 選擇棄用佐真奴是福 還是禍？》
https://bit.ly/38EW4gV
.
#Chelsea #車路士 #錫菲聯 #英超
［圭亞那奇趣錄］昨日無聊講咗奎亞那同法屬圭亞那（https://bit.ly/3eHp8Hw），大家反應甚好，證明作者啲期望同讀者反應永遠係兩回事。
咁今次不如講，荷屬圭亞那，而家叫做蘇里南。
實在慚愧，唔係有人留言，我都醒唔起「荷屬圭亞那」。但其實呼之欲出，估都估到。而家嘅「圭亞那」之前係英屬圭亞那，昨日亦講過法屬圭亞那。咁中間嘅就係蘇里南，而蘇里南同荷蘭關係甚密，估都估到係「荷屬圭亞那」。實情就係殖民年代，將「圭亞那」呢個地方分餅仔，姑息分割的大地，劃了界線，一人一份咁。
非正式統計，蘇里南應該出名過圭亞那同法屬圭亞那。除咗個名易記啲外，亦因為荷蘭。埃汾去過兩次荷蘭，一次係2001年，仲用緊荷蘭盾，一次係2008年，去波羅的海三國，但荷蘭轉機，快閃玩咗陣咁。
好記得，在荷蘭，很多蘇里南的東西。最顯眼當然係啲長途電話卡廣告（08應該少咗好多），講打去蘇里南幾錢一分鐘。仲有大量嘅蘇里南餐廳廣告，甚至荷蘭菜（居然有荷蘭菜？其實啲喜寧魚幾好食，不過好多人怕腥）亦融合蘇里南，同埋印尼（荷屬東印度嘛）。
蘇里南有乜產業？好似冇法屬奎亞那或奎亞那咁窮，但主要都係差不多嘅嘢，採礦，資源。鋁土礦，黃金，石油，仲有甘蔗。
仲有，最重要嘅，足球。
荷蘭球迷當然知道蘇里南，事實上荷蘭嘅黑人球員，特別係再上一代嗰啲，絶大多數嚟自蘇里南。你睇維基嘅蘇里南名人，全部都係荷蘭足球員。
當然有啲係蘇里南出世，有啲係荷蘭出世。新一代嘅好少蘇里南出世了，多數落地生根第二三代，掉轉仲有不少荷蘭出世返去代表蘇里南。
例如邊啲？真係唔使好狂熱嘅球迷都識。早年嘅戴維斯，施多夫，哈索賓基，雲達，仲有迪莊老豆，全部都係蘇里南出世。古列治，古華特（老豆同仔），迪莊（仔），列卡特就荷蘭出世，但都係蘇里南人。至於近代蘇里南出世嘅就好似冇乜，韋拿杜姆，雲迪克都係荷蘭出世。
然後就要講一個不解之謎：戴維斯，施多夫，哈索賓基，雲達—全部都係同一個城市出世。唔止，根本所有蘇里南本土球員，都係同一個城市出世的！你去睇下蘇里南國家隊名單（https://bit.ly/34O5V2f）？有一堆係荷蘭出世代表返蘇里南，但蘇里南出世嘅，全部都係同一個城市—Paramaribo
Paramaribo當然係蘇里南嘅首都，但點解所有球員都係嗰度出世？就真係唔知了。呢個開心大發現好似冇乜人提過，我早兩年講過，網友有以下幾個假說：
首都多人—可能係，Paramaribo廿幾萬人，佔咗蘇里南一半。仲要第二大城市只係得萬幾人。但，照計都冇咁極端？一個嚟自第度都冇？或者稍為有錢啲嘅都只會住嗰度？但足球員出身，好多都好窮，至少上一代係。
得首都有醫院—呢個亦都可能係，可能全部生仔都去首都生？但蘇里南都唔算極細，況且，嗰個年代，應該唔少係就咁自己屋企生？
出世紙問題—呢個我估接近真相。無論你邊度出世，可能去拎出世紙，都係當你首都出世。亦都可能根本有啲冇文件嘅，但要出國踢波咪要整份文件，當年唔知邊度出世冇紀錄嘅，咪當首都
亂報 — 可能球員去到外國嘅，講你都唔知邊度架啦，報首都算
冇乜人理 — 留意我話所有蘇里南出世嘅蘇里南／荷蘭球員，都係寫Paramaribo出世—但其實有唔少係冇寫邊度出世的，只係寫蘇里南。亦可能係同上個點一樣，冇人理係邊。
類似呢個情況，第啲國家都有。之前2018世界盃，咩城市出產最多參加者？答案係：巴拿馬城，18件，因為巴拿馬入咗世界盃，而23人有18件都係巴拿馬城出世 ！類似情況仲有秘魯，23件有17件利馬出世。冰島，13件雷克雅未克,。烏拉圭，10件Montevideo
BTW，蘇里南仲出過一個奧運金牌—實則史上得一條友拎過獎牌，一次銅牌一次金牌。但應該唔易估係咩項目 — 居然係100米蝶泳。有乜特別？應該知道黑人好少拎游泳獎牌，聞說同啲基因身體構造有關。呢位Anthony Nesty 係史上第一個拎游泳金牌嘅黑人，仲要係南美小國，極具意義。
寫到最尾卒之搵到一個唔係Paramaribo出世嘅蘇里南球員！（https://bit.ly/2RRzESK），不過冇踢過國家隊。Ken Monkou陳年踢過車路士修咸頓，睇下有冇人識。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
